خلصنا صلاة العشاء والوتر ونزلنا من المسجد وعاد نحنا إلاخرجنا صاح الحاج صالح ابوالدجاج قائلا : الامام صلى بنا العشاء ثلاث ركعات وانا اصيح من الخلف سبحان الله سبحان وهو يتصانج وواصل الصلاة والهبل في الصف الاول ولا واحد راجعه .. طيب ليش عادهم حاجزين الصف الاول واذا الامام غلط يسكتوا ولانخس اصلهم بقر رقود..

رد عليه الحاج سالم : مالك ايش من ثلاث ركعات الرجال صلى اربع ركعات كاملة يبان انت اللي كنت تطوس تعد الدجاج حقك اثناء الصلاة..

انا ضحكت وقلت له : احتمال يكون غلط ياسالم..
قفز الحاج صالح وقال : هذا بعم ولا يفهم حاجه يدخل المسجد ويخرج كما دخل مش فاهم شىء وقته كله نوم في بيت الله..

قال سالم : طيب ياشعرواي ياعالم فهمنا كيف صلى ثلاث ركعات ولا احد اعترض الا انت خاف حسبت انه عمل لك تخفيض وسامحك بركعة..
رد عليه صالح : دائما انت تقاطعنا ويزعلك كلامي ياخالد امانتك كم صلى بنا..

فوجئت بالسؤال واربكنا لاننا اعرف ان الامام صلى بنا اربع ركعات وان قلت هذا بايزعل الحاج صالح وهو يسلفنا الدجاج لآخر الشهر وبايقطع علي التموين واذا قلت ثلاث اكون كذبت وهذا لايجوز..

قلت بسرعة : ذالحين انتم بعقولكم نتخانق على موضوع منتهي والناس روحوا والمسجد قفلوه..
هيا امشوا ندور لنا عشاء وبكرة في المسجد بانعرف كم صلى بنا..
سالم قال : ذا مخرف كل يوم معه خبر هيا مع السلامة ومشى..

صاح الحاج صالح وقال : انا مخرف يابلا حياء ليش تهرب انتظر رفع عصاته وحاول الذهاب وراه مسكته من يده وقلت : ياحاج هب الله بقلبك مافيش داعي للمشاكل سالم مضربه يضرب ويهرب خليك انت العاقل..
قال : اصلا اهبل يتدخل في امور مايفهمها..
ولفت الى عندي وقال : خالد امانتك كم صلى بنا؟؟
مش ثلاث ركعات..؟؟

لمحت محمد ابني وصحت يامحمد..يامحمد اصبر اشتيك وقلت للحاج صالح : بكرة الفجر بانواصل الموضوع  وطحست عليه..
هيا كيف تشوفوا كل يوم من ذا نحن والشيوبة الزنين..!!

عدن الغد